၁၅-၇-၂၀၁၉ တွင် ပြုလုပ်ခဲ့သည့် ဒုတိယအကြိမ် ပြည်ထောင်စုလွှတ်တော်၊ (၁၃)ကြိမ်မြောက် ပုံမှန်အစည်းအဝေး ပထမနေ့တွင် ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီ၏ အတွင်းရေးမှူး ဒေါက်တာမြတ်ဉာဏစိုးမှ လေ့လာတွေ့ရှိချက်နှင့် သဘောထားမှတ်ချက်အစီရင်ခံစာကို လွှတ်တော်သို့ တင်သွင်းခဲ့ပါတယ်။
ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီ၏လေ့လာတွေ့ရှိချက်နှင့် သဘောထားမှတ်ချက်အစီရင်ခံစာအရ ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီကို ၁၉-၂-၂၀၁၉ ရက်နေ့တွင် ပြည်ထောင်စုလွှတ်တော်မှတာဝန်ပေးအပ်ခဲ့ပြီး ကော်မတီအစည်းအဝေးများကို ၂၀-၂-၂၀၁၉ မှ ၁၃-၆-၂၀၁၉ ရက်နေ့အထိ လွှတ်တော်တွင်းရှိ နိုင်ငံရေးပါတီ (၁၄) ပါတီတို့မှ ကိုယ်စားလှယ်များ ၊ တသီးပုဂ္ဂလကိုယ်စားလှယ်များနှင့် တပ်မတော်သားလွှတ်တော် ကိုယ်စားလှယ်များအစုအဖွဲ့ မှ ကိုယ်စားလှယ်များဖြင့်ကျင်းပခဲ့ပါတယ်။ ( အစီရင်ခံစာတွင် ကော်မတီအစည်းအဝေးကာလအား ၂၀-၂-၂၀၁၉ မှ ၁၃-၆-၂၀၁၉ အထိဟု ဖော်ပြထားသည်။ သို့သော်အစည်းအဝေးကျင်းပမှုအား ၂၀.၂.၂၀၁၉မှ ၁၂.၇.၂၀၁၉ ထိ စုစုပေါင်း (၂၅) ကြိမ်ကျင်းပခဲ့ကြောင်းကို ပြည်ထောင်စုလွတ်တော် ဥပဒေကြမ်းပူးပေါင်းကော်မတီ Facebook (shorturl.at/ABGR1) စားမျက်နှာတွင် ဖော်ပြထားသည့် အစည်းအဝေးနေ့စွဲနှင့် အကြိမ်အရေအတွက်ကို ကောက်ယူစုစည်းခြင်းအရ တွေ့ရှိရပါသည်)
ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက်အစီရင်ခံစာအရ ဖွဲ့စည်းပုံအခြေခံဥပဒေ (၂၀၀၈ ခုနှစ်) ပါ ပုဒ်မ၊ ပုဒ်ခွဲများအပေါ် ပြင်ဆင် ၊ ပယ်ဖျက်၊ ဖြည့်စွက် ရန် အကြံပြုချက် စုစုပေါင်း (၃၇၆၅) ချက်ရှိကြောင်း ဖော်ပြထားပါသည်။
၂၀၀၈ ခုနှစ် ဖွဲ့စည်းပုံအခြေခံဥပဒေတွင် အခန်းပေါင်း (၁၅) ခန်းဖြင့်ဖွဲ့စည်းထားပြီး အကြံပြုချက်စုစုပေါင်း၏ (၇၂ %) မှာ အုပ်ချုပ်ရေး ( ၃၂ % )၊ ဥပဒေပြုရေး ( ၂၃ %)၊ တရားစီရင်ရေး (၁၇%) စသည့်ဖြင့် အခန်း (၃) ခန်းရှိ ပုဒ်မ၊ ပုဒ်ခွဲများအပေါ် အကြံပြုထားကြောင်းတွေ့ရှိရပါတယ်။
ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီ၏ အစီရင်ခံစာအရ ကော်မတီတွင်ပါဝင်သည့် နိုင်ငံရေးပါတီ (၁၄) ပါတီအနက်မှ ရှမ်းတိုင်းရင်းသားများဒီမိုကရေစီအဖွဲ့ချုပ်(၃၀ %)၊ ရခိုင်အမျိုးသားပါတီ (၂၃ %)၊ မွန်အမျိုးသားပါတီ (၁၇ %)၊ အမျိုးသားညီညွတ်သော ဒီမိုကရက်တစ်ပါတီ (၁၂ %) အား အကြံပြုတင်ပြခဲ့ကြောင်းတွေ့ရှိရပြီး ၎င်း(၄) ပါတီ၏အကြံပြုချက်စုစုပေါင်းမှာ စုစုပါင်းအကြံပြုချက်၏ (၈၂ %) ရှိကြောင်းတွေ့ရှိရသည်။ လက်ရှိတွင် ပုဒ်မ၊ ပုဒ်ခွဲများအပေါ် အကြံပြုထားသည့်အချက်အလက်အသေးစိတ်နှင့် နောက်ဆက်တွဲများကို အများပြည်သူအား ထုတ်ပြန်ထားခြင်း မရှိသေးပါ။
ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်းကော်မတီမှ တင်သွင်းသည့် အစီရင်ခံစာအပေါ်ပြည်ထောင်စုလွှတ်တော်ကိုယ်စားလှယ်များမှ ဆွေးနွေးနိုင်ရန် ၂၂-၇-၂၀၁၉ နောက်ဆုံးထားပြီး အမည်စာရင်းတင်သွင်းနိုင်ကြောင်း ပြည်ထောင်စုလွှတ်တော်နာယကမှ ကြေညာခဲ့ပါတယ်။
(မှတ်ချက်။ အစီရင်ခံစာတွင် အကြံပြုချက်စုစုပေါင်းမှာ (၃၇၆၅)ချက် ရှိကြောင်းဖော်ပြထားသော်လည်း အစီရင်ခံစာ၏ အပိုဒ် ၄ တွင် နိုင်ငံရေးပါတီနှင့် အစုအဖွဲ့အလိုက် (က) မှ (ဋ) ထိဖော်ပြထားသည့်အကြံပြုချက်များ၏ စုစုပေါင်းပေါင်းလဒ်မှာ(၂၃၂) ချက်ရှိပြီး အပိုဒ် ၁၉ (က) တွင်မူ “အခန်း(၁)တွင် (၂၃၁) ချက်” ဟုဖော်ပြထားခြင်းကြောင့် အချက်အလက်ကွဲလွဲနေပါသည်။ ထို့ကြောင့် ယခုဖော်ပြချက်အကြောင်းအရာအချက်အလက်များမှာ အခန်း(၁) အတွက်အကြံပြုချက် (၂၃၂) ချက်ရှိသည်ဟုယူဆပြီး စုစုပေါင်းအကြံပြုချက် (၃၇၆၆) ချက်ပေါ်အခြေခံ၍တွက်ထုတ်ထားပါသည်။)
